Op fjouwer ûnderdielen de heechste skoare:
Menameradiel winner Webstekaward!

Direkteur Koen Eekma fan de Afûk hat fan ‘e middei op de konferinsje ‘Gemeenten en Frysk’ yn de Broeretsjerke (Boalsert) de priis foar de bêste Fryske webside útrikt oan wethâlder Anna Martha Van der Mei fan de gemeente Menameradiel. Dy gemeente hat op in fjouwertal aspekten de heechste einskoare en is dêrmei troch in saakkundige sjuery as bêste beoardield. 

De sjuery fan de ‘webstekaward’ waard dit jier foarme troch fertsjintwurdigers fan de Afûk (Sito Wyngaarden), it ICT-bedriuw Knooppunt út Hearrenfean (Wilco Kuipers) en de provinsje Fryslân (Jacob Kooistra). De webstekaward is ynsteld troch de provinsje Fryslân om it brûken fan it Frysk troch gemeenten op it ynternet te befoarderjen. Neist de mjitte fan it Frysk brûken waarden ek kwaliteitsaspekten troch de sjuery meirekkene. De sjuery hat de websites fan de 27 fêstewâlsgemeenten hifke oan de folgjende kritearia:
1. Algemien, opbou webside;
2. Taalspesifyk;
3. Technyk;
4. (beantwurdzjen fan) e-post.

It totaal fan boppesteande kriteria resultearret yn in skoare fan de sjuery. It gemiddelde fan de sjueryskoare en de skoare fan Overheid heeft Antwoord © waard úteinlik de einskoare.

Uteinlik is de gemeente Menameradiel  de winner wurden fan de bêste webstek fan de 27  gemeenten oan ‘e fêstewâl as sjoen wurdt nei Frysk én kwaliteit.  Sjoch hjir foar in folslein oersjoch fan de útslach.